Гулистонда гимнастика спорти турларига ихтисослаштирилган спорт мактаби фойдаланишга топширилди

Мазкур объект қурилиши учун 4 миллиард 30,0 миллион сўм сарфланди, спорт иншооти 187,6 млн сўмлик спорт анжомлари ва инвентарлари билан таъминланди. Энди сирдарёлик ёшлар гимнастикага ихтисослаштирилган болалар-ўсмирлар спорт мактаби тасарруфидаги мазкур мажмуада бадиий гимнастика, спорт гимнастикаси, батутда сакраш, спорт акробатикаси, аэробика каби спорт турлари билан шуғулланишлари мумкин.

Гимнастикага ихтисослаштирилган болалар-ўсмирлар спорт мактаби универсал залининг очилиш маросимида Жисмоний тарбия ва спорт вазири Д.Набиев, Сирдарё вилояти ҳокими Ғ.Мирзаев, Ўзбекистон гимнастика федерацияси биринчи вице-президенти Руслан Мустаев, трамполин бўйича Ўзбекистон миллий терма жамоаси бош мураббийи, Олимпия ўйинлари совриндори Екатерина Хилько ва бошқалар иштирок этишди. Тадбир давомида Осиё ўйинлари кумуш медали соҳиби Сабина Тошкенбоева, ўсмирлар Олимпия ўйинлари қатнашчиси, Осиё чемпиони Анора Давлатова сингари таниқли спортчилар Сирдарёлик ёш спортчиларга маҳорат дарси ўтиб беришди.

Жисмоний тарбия ва спорт вазири Д.Набиев сирдарёликларни қўшалоқ байрам – Наврўз айёми ҳамда кўркам, замонавий спорт мажмуасининг очилиш маросими билан қутларкан, жумладан, шундай деди:

– Мамлакатимиз раҳбарининг Сирдарёга ташрифидан сўнг, вилоят спорти янги ўзгаришлар, янада юқори кўрсаткичлар сари юз тутди. Мазкур замонавий мажмуанинг фойдаланишга топширилиши ҳам ушбу жараённинг бир бўлагидир. Сирдарё замини юртимизга жуда кўп истеъдодларни тарбиялаб берган. Энди мана шу гимнастика турларига ихтисослаштирилган болалар-ўсмирлар спорт мактабидан ҳам Ватанимиз шаънини жаҳон майдонларида муносиб ҳимоя қиладиган ўғил-қизлар етишиб чиқишига шубҳа йўқ.