05 май 16:16
Янгиликлар

Бошқалар, Болалар спорти

Гулистондан махсус репортаж: Бахтсиз ҳодисадан жабр кўрганлар ўртасида қизиқарли мусобақалар ўтказилмоқда

Сардоба сув омбори билан юз берган бахтсиз ҳодисадан натижасида зарар кўрган ҳудудлардан кўчирилган аҳоли саломатлиги ва руҳий ҳолатини мустаҳкамлаш мақсадида улар ўртасида турли спорт турлари бўйича қизиқарли мусобақалар ташкил этилмоқда.

Жумладан, Гулистон шаҳрида жойлашган Олимпия захиралари мактаб-интернатига жойлаштирилган 700 нафарга яқин аҳоли бугун тонгни уюшган ҳолда эрталабки бадантарбия машғулотлари билан бошлади.

Шундан кейин, аёллар ва болалар ўртасида ўзига хос эстафета мусобақаларига старт берилди. Иштирокчилар жамоаларга бўлинган ҳолда арқон тортишиш ва эстафетанинг бошқа йўналишлари бўйича ўзаро беллашишмоқда.

Шунингдек, ёшлар ва ҳаваскорлар ўртасида стол тенниси, бадминтон, волейбол, баскетбол, шахмат ва шашка бўйича мусобақалар ҳам ташкиллаштирилмоқда. Мусобақа якунида ғолиб ва совриндорлар мутасаддилар томнидан тақдирланишади.

Кеча ҳам кун давомида стол тенниси, шахмат ва шашка бўйича мусобақалар ўтказилган эди. Мусобақалар якунида ғолибларга махсус эсдалик совғалари топширилди.

Хабарингиз бор, айни пайтда Сардоба фожеасидан жабр кўрган маҳаллий аҳоли учун республикамизнинг барча ҳудудларидан инсонпарварлик ёрдамлари жўнатилмоқда. «Саховат карвонлари» Гулистон шаҳрида мутасадди ходимлар томонидан кутиб олиниб, фаоллар билан биргаликда сардобаликларга тарқатилмоқда.