Гулруҳбегим Жаҳон кубоги йўлидаги асосий рақибасини енгди

Аёллар ўртасида ўтказилаётган мусобақанинг учинчи турида халқаро гроссмейстеримиз Гулруҳбегим Тоҳиржонова муҳим ғалабага эришди. Турнир рейтингида биринчи рақам остида таснифланган Тоҳиржонова қора доналарда ҳаракат қилишига қарамай, ўзи сингари икки ғалабага эришган қозоғистонлик Мадина Давлетбаевани мағлубиятга учратди. 

Ҳамюртимиз Нилуфар Ёқуббоева қозоғистонлик Бибисара Ассаубаевадан устун келди. Гроссмейстеримиз Сарвиноз Қурбонбоева яна бир қозоғистонлик шахматчи Гулисхан Нахбаева билан дурангга имзо чекди. Баҳора Абдусатторова қозоқ шахматчиси Меруерт Камалиденовани енгди. 

Бугун ўтказиладиган тўртинчи тур олдидан Тоҳиржонова 3 очко билан якка пешқадам бўлиб турибди. Нилуфар Ёқуббоева 2,5 очко билан иккинчи ўринни банд этган. Кейинги поғоналардан жой олган шахматчилар ҳисобида икки ва ундан камроқ очко бор. Бугун тўртинчи турда ўзбек дербиси бўлиб ўтади. Гулруҳбегим оқ доналарда Ёқуббоевага қарши баҳс олиб боради.