Гулруҳбегим Хитойдаги кучлилар турнирида қандай иштирок этяпти?

Умумий соврин жамғармаси 119 000 АҚШ долларини ташкил этувчи Belt & Road China 2019 мусобақасида сайёрамизнинг кучли шахмат қироличалари ўз маҳоратларини намойиш этяпти. Улар орасида гроссмейстеримиз Гулруҳбегим Тоҳиржонова ҳам дона сурмоқда. 

Тоҳиржонова бугунгача ўтказилган еттита турда 3,5 очко жамғарди. У 7-турда ҳиндистонлик машҳур шахматчи Харика Дроноваллига қарши қора доналарда ҳаракат қилиб, мағлубиятга учради. Гулруҳбегим айни дақиқаларда 8-турда эронлик Сарасадат Хадемалшарехга қарши қора доналарда ҳаракат қиляпти. 

Хитойдаги халқаро турнирда россияликлар Александра Костенюк, Ольга Гиря, ҳиндистонлик Харика Дроновалли, грузияликлар Нино Батсиашвили, Нана Дзагнидзе, болгариялик Антоанета Стефанова, украиналик Анна Ушенина сингари машҳур гроссмейстерлар дона суришяпти. 

Маълумот учун, мусобақа ғолиби 40 000 долларни қўлга киритади. Иккинчи ўринга 20 000, учинчи ўринга 15 000 АҚШ доллари миқдоридаги мукофот пули кафолатланган.