Гусковга ягона мағлубиятини тақдим этган Ўздемир 16 ойга дисквалификация қилинди

Асли келиб чиқиши туркиялик, ҳозирда Швейцария шарафини ҳимоя қилаётган Волкан ташкилотнинг допингга қарши сиёсатини бузгани учун ўн олти ойга дисквалификация қилинди.

36 ёшли аралаш яккакураш устаси ўзининг четлатилиши ҳақида ижтимоий тармоқда гапириб, эритропоэтин гормонини истеъмол қилганини тан олди.

"Мен тўпиғимдаги операциядан кейин тикландим. Шифокор мени бу препарат хавфсиз эканлиги ва допинг назоратида аниқланмаслигига ишонтирди. Ўша куни кечқурун биринчи инъекцияни қилдим. Бу менинг қарорим ва ҳаётимдаги энг катта хатом эди. Мен масъулиятни тўлиқ ўз зиммамга оламан. Ҳар бир спортчи ўз организмига нима тушаётганига жавоб беради. Мен ўз спортимга, мухлисларимга ва ўзимга панд бердим", - деб ёзди Ўздемир ижтимоий тармоқда.

Волканнинг сўзларига кўра, февраль ойида топширилган допинг тести ижобий натижа берганидан сўнг, у дарҳол қоидабузарликни тан олган ва UFC ва антидопинг ташкилотлари билан ҳамкорлик қила бошлаган. Шу боисдан ҳам дисквалификация муддати 16 ойга қисқартирилган.

Эритропоэтин буйраклар томонидан ишлаб чиқарилади ва қизил қон таначалари ҳосил бўлишини рағбатлантиради, спортда эса энг машҳур допинг препаратларидан бири ҳисобланади, чунки у қоннинг кислородни ташиш қобилиятини оширади, шунга мос равишда чидамлиликни яхшилайди ва тикланишни тезлаштиради.

Маълумот учун, Волкан Ўздемир сўнгги жангини ўтган йилнинг ноябрь ойида Қатарда бўлиб ўтган UFC турнирида ўтказган ва биринчи раунддаёқ Алонсо Менифилдни нокаутга учратган эди.