Гусковнинг қиёфадошига янги рақиб берилди

Ўрта вазн тоифаси UFC рейтингида тўққизинчи ўринни эгаллаб турган Роман Долидзе яримоғир вазнга қайтади ва сафдан чиққан Карлос Улбергнинг ўрнини эгаллайди. Улберг жароҳати сабаб Энтони Смитга қарши кечиши керак бўлган жангдан "ечилганди". Смит ҳамюртимиз Богдан Гусковнинг қиёфадоши ҳисобланади. 

Ушбу жанг UFC 303 турнирининг аҳамияти жиҳатидан учинчи тўқнашуви бўлади. 35 ёшли Роман Долидзе охирги иккита жангида мағлубиятга учраган. У Марвин Веттори ва Нассурдин Имавовга қарши кечган жангларда имкониятни бой бериб қўйганди. Унгача грузиялик аралаш яккакураш устаси кетма-кет тўртта жангда ғалаба қозонганди. Ғалабаларининг учтасини муддатидан аввал қўлга киритган. 

Энтони Смитга келадиган бўлсак, у сўнгги йилларда барқарор жанг ўтказа олмаяпти. У сўнгги бешта жангидан учтасида мағлубият аламини тотиб кўрган. Америкалик 35 ёшли Смит яримоғир вазн тоифаси UFC рейтингида ўнинчи ўриндан жой олган. Энтони сўнгги жангида Витор Петринони биринчи раунддаёқ мағлуб эта олганди.