«Ҳакамлар хатолари Олимпиадаси»

Бу Олимпиадада ҳакамлар жуда кўп хатоларга йўл қўйишган.

Тўсиқлар оша 3000 метрга югуришда спортчилар стадионда чопиб ўтаётган доирани санаб турган ҳакам ўз жойини тарк этгани сабабли улар бир давра кўп масофани босиб ўтишга мажбур бўлишган. Бу югуриш натижалари бекор қилинмаган. 3450 метр масофани 10 дақиқаю 33,4 сонияда босиб ўтган фин Волмари Исо-Холло ғолиб деб эълон қилинган.

Аёллар ўртасида 100 метрга югуришда польшалик Станислава Валасевич янги жаҳон рекорди ўрнатгани ҳолда ғолиб чиққан. Фақат 1980 йилда бу Олимпиада чемпиони автоҳалокатда ҳаётдан кўз юмганида… унинг эркак эканлиги маълум бўлган.

От спорти бўйича мусобақаларда ҳам фавқулодда ҳолат юзага келган – ҳеч бир жамоа йўл қўйилган хатолар, масофадан нотўғри ўтиш, йиқилиш ва ҳоказолар сабабли Миллатлар Катта мукофотига сазовор бўлмаган.

Замонавий бешкурашда аввалги Олимпия ўйинлари чемпиони, вазни 100 килограмдан ортиқ бўлган швед Свен Тофельтга энг озғин отни бошқаришга тўғри келган. Бечора от уч марта қоқилиб йиқилган ва бу йўналишда Тофельт фақат 15-натижани қайд этган. Аммо якуний натижа бўйича у тўртинчи ўринга кўтарила олган.

Португалиялик бешкурашчи де Гередий эса янада мураккаб вазиятга рўпара бўлган. Унинг оти итоаткор, бироқ жуда ҳиссиётли ва нозик табиатли экан. Чавандоз қамчи ва темир тепкини ишлатиши билан от спортчини йиқитиб қочиб қолган. Отни аранг ушлаб, спортчига тутқазганларидан кейин де Гередий яна қамчи босгач, от чавндозни тағин қулатган ва уни медаллардан маҳрум қилган.