05 июн 19:00
Янгиликлар
Сув спорти турлари
Ҳамюртларимиз сузиш бўйича Италиядаги анъанавий халқаро турнирида муваффақиятли иштирок этдилар
2017 йилнинг 1-4 июнь кунлари Италия пойтахти Рим шаҳрида сузиш бўйича “Tiro a volo nuoto” анъанавий халқаро турнири ўтказилди.
Учинчи бор ташкил
этилган мазкур мусобақада Европанинг қатор давлати вакиллари каби
мамлакатимиз спортчилари ҳам совринли ўринлар учун кураш олиб бордилар.
Эътиборлиси, мазкур халқаро турнирда Ватанимиз шарафини ҳимоя қилган 4
нафар спортчимиздан учтаси совринли ўринларни банд этишди.
Жумладан, терма
жамоамиз етакчиларидан бири Ҳуршиджон Турсунов 100 метр масофага эркин
усулда сузиш бўйича ўтказилган мусобақада 00:49.54 сония натижа билан
олтин медалга сазовор бўлган бўлса, 200 метр масофага эркин усулда сузиш
баҳсларида ҳам маррага 1:50.55 сонияда етиб келиб, шоҳсупанинг энг
юқори поғонасига кўтарилди. Қувонарлиси, Ҳуршиджон ҳар икки йўналишда
ҳам “Tiro a volo nuoto” халқаро турнирининг рекордини янгилади.
![]()
Яқиндагина Жиззах
шаҳрида бўлиб ўтган “Баркамол авлод-2017” спорт мусобақасида биринчи
ўринни эгаллаган Артём Козлюк ҳам “Tiro a volo nuoto” халқаро
турнирининг рекордини янгилашга муваффақ бўлди. 200 метр масофага
баттерфляй усулида сузиш бўйича ўтказилган мусобақада 2:01.07 сония
натижа қайд этган Артём олтин медални қўлга киритиш билан бирга, халқаро
турнирнинг рекордини ҳам янгилади. Бундан ташқари тажрибали спортчимиз
50 метр масофага баттерфляй усулида сузиш мусобақасида 00:24.45 сония
натижа билан биринчи, 100 метр масофага баттерфляй усулида сузишда эса
00:54.04 сония кўрсаткич билан иккинчи ўринни эгаллади.
![]()
“Баркамол авлод-2017”
спорт ўйинларида бир неча йўналишда ғолиблик шоҳсупасига кўтарилган
Алексей Тарасенко Рим шаҳрида ўтказилган халқаро турнирда ҳам муносиб
иштирок этиб, терма жамоамиз ҳисобига бир йўла учта кумуш медални
келтирди. Хусусан, эркин усулда сузиш бўйича 50, 100 ва 200 метр
масофаларга ўтказилган мусобақаларда мос равишда 00:23.08 сония,
00:50.38 сония ва 1:51.03 сония натижаларни қайд этган Алексей Тарасенко
уч бор шоҳсупага кўтарилди. Шундай қилиб, “Tiro a volo nuoto” халқаро
турнирида иштирок этган юртдошларимиз 4 та олтин ва 4 та кумуш
медалларга сазовор бўлдилар.
![]()
“Рим шаҳрида ўтказилган
халқаро турнир спортчиларимиз учун жорий йилнинг 14-23 июль кунлари
Венгрия пойтахти Будапешт шаҳрида ўтказиладиган жаҳон чемпионати олдидан
ўзига хос тайёргарлик босқичи вазифасини ҳам ўтади, - дейди Ўзбекистон
сузиш федерацияси бош котиби Алишер Ғаниев. Жаҳон чемпионатига
тайёргарликнинг сўнгги босқичини спортчиларимиз мамлакатимизда
ўтказишади.
![]()
Спортчиларимизга сузиш
спорт турининг энг йирик мусобақаларидан бири ҳисобланган жаҳон
чемпионатига муносиб тайёргарлик кўришлари учун барча зарур шароитлар
яратилган. Умид қиламизки, Венгрияда бўлиб ўтадиган жаҳон чемпионатида
ҳам спортчиларимиз ўзларига билдирилган ишончни оқлашади”. Биз ҳам ўз
навбатида спортчиларимизга бўлажак йирик мусобақада омад ва зафарлар
тилаб қоламиз. Маълумот учун. Жаҳон чемпионатида Ватанимиз шарафини
Ҳуршиджон Турсунов, Алексей Тарасенко, Артём Козлюк ва Даниил Букин
ҳимоя қиладилар.
Ҳавола :
Манба : olympic.uz
Фикрлар