Ҳарбийлар ўртасида тош кўтариш ва баҳодирлар ўйини бўйича мусобақа ўтказилди

Қуролли кучлар академияси спорт майдонларида тош кўтариш ва баҳодирлар ўйинлари бўйича ҳарбий спортчилар ўртасида йирик мусобақа ташкил этилди.

100 нафардан зиёд спортчилар ўртасида қизғин баҳсларга бой бўлган тош кўтариш мусобақаларида -65 кг вазнда Рустам Жўраев ғолибликни қўлга киритган бўлса, -70 кг вазнда Дилбек Абдуллаев, -75 кг вазнда Азамат Усанов, -80 кг вазнда Мирзоҳид Эргашев, -90 кг вазнда Жуманазар Абдиев, +90 кг вазнда Достон Йўлдошевлар тенгсиз эканлигини исботладилар.

Баҳодирлар ўйини мусобақаларида ёшлар ўртасида Ислом Ҳакимжонов 1-ўринни қўлга киритди. Катталар ўртасидаги баҳсда Баҳодир Йўлчиев ғалаба қозонди.

Маълумот учун, Ўзбекистон Республикаси Президентининг 2019 йил 13 декабрдаги “Ўзбекистон Республикаси Қуролли Кучлари ташкил этилганлигининг 28 йиллиги ҳамда Ватан ҳимоячилари кунига тайёргарлик кўриш ва ўтказиш чора-тадбирлари тўғрисида”ги фармойишида белгиланган вазифалар ижросини таъминлаш бўйича Ўзбекистон Республикаси Вазирлар Маҳкамасида 2019 йил 28 декабрда ўтказилган видеоселектор йиғилишида белгиланган топшириқлар ижроси бўйича Жисмоний тарбия ва спорт вазирлигининг 2019 йил 31 декабрдаги 2282-сонли буйруғи ижросини таъминлаш мақсадида вазирлик томонидан яна бир қанча спорт мусобақалари ўтказилиши белгиланган.