Ҳасанбой Дўсматов 12 раундга тайёрлиги, чемпионлик жанги, Осиё ўйинлари ва бошқа мавзулар ҳақида гапирди

"Ушбу жангни узоқ вақтдан бери кутгандим. Ўзбекистонда юртошларимизга хурсандчилик улашишни мақсад қилгандим, шукр иккинчи марта бу ниятимга эришдим.  Бунга шароит яратиб берган барчага раҳмат айтаман. 

Агар жароҳати бўлмаганида жангни тўлиқ ўтказишга кучи етарди. У тажрибали рақиб. Мағлуб бўлган рақиблари рўйхатига назар ташласак ҳам, улар кучли боксчилар эди. 

Менежерларим кейинги жангимни жаҳон чемпионлиги камари учун ташкил этишни ваъда қилишган. Буни жудаям кутяпман. 12 раундлик жангга тайёрман. Умид қиламанки, кейинги жангим чемпионлик учун бўлади. Бироқ бу фақат ўзимга боғлиқ эмас. Таиландлик рақибим рози бўлса, март-апрель ойига қадар кўп нарсага ойдинлик киритилади.

Ҳаваскор бокс? Жаҳон чемпионатига яхши тайёргарлик кўргандик, аммо насиб қилмаган экан. Пешонада ёзилгани бўлади. Олдинда Осиё ўйинлари ҳам турибди. Шунингдек, Тошкент мезбонлик қиладиган жаҳон чемпионати ҳам бор. Агар проф боксда чемпионлик камарини қўлга киритсам, Осиё ўйинлари ва жаҳон чемпионатларида иштирок эта олмайман",-деди Ҳасанбой Дўсматов.