Ҳасанбой Дўсматов эртага тонгда проф боксда дебют қилади, унинг 19 ёшли рақиби 16 та жанг ўтказган

Plaza De Toros аренасида ўтувчи ушбу бокс оқшомидан жами 11 та жанг ўрин олган. Биз учун аҳамиятлиси, андеркард жангдан аввал, яъни охиридан ҳисоблаганда, учинчи жангда ҳамюртимиз Ҳасанбой Дўсматов рингга кўтарилади.

Рио-2016 Олимпиадаси чемпиони ўзининг проф боксдаги дебют жангида мексикалик 19 ёшли боксчи Хесус Сервантес Виллануэвага қарши рингга чиқади. Хесус ёш бўлишига қарамай, проф рингда 16 та жанг ўтказган. Тўққизта жангда ғалаба қозонган, шуларнинг 5 таси нокаут билан. Ҳисобида 7 та мағлубият бўлиб, қизиғи, уларнинг барчасида нокаутга учраган. Барча жангларини Мексикада ўтказган. Ҳозирча сўнггиси бўлиб турган жангини шу йилнинг 4 октябрь куни Абрахам Родригесга қарши ўтказиб, мағлуб бўлган.   

Бугун боксчилар анъанага кўра тарозидан ўтиш маросимида иштирок этишди. Ҳар икки боксчи ҳам белгиланган вазн меъёрини бажаришди. Дўсматов 48 кг 200 грамм тош босди. Бокс оқшоми афсонавий Оскар Де Ла Хойяга тегишли Golden Boy Promotions промоутерлик компанияси томонидан ўтказилмоқда.