Ҳасанбой Дўсматов Мексикада рингга чиқиши мумкин

Биз чарм қўлқоп устамиз билан боғланиб, режалари ҳақида сўрадик. 

"Ака-ука Диаслар қўл остида машғулотларни давом эттиряпман. Шаҳрам ва Исроил билан бирга шуғулланяпмиз. Лекин ҳозирча жангим санаси, манзили ва рақибим юз фоизга аниқ эмас. Менежерлар бу бўйича иш олиб боришяпти. Тез кунда тасдиқланиши керак. Катта эҳтимол билан Мексикада жанг ўтказсам керак. 

Кўпчилик кутаётгандек, Бивол - Канело оқшомида жанг қилмайман. Бу бокс оқшомининг карди аллақачон тўлиб бўлган. Вазнимни ўзгартирганим йўқ - 49 килода рингга чиқаман", - деди Дўсматов. 

Эслатиб ўтамиз, Ҳасанбой Дўсматов ўтган йилнинг декабрь ойида Тошкентда ўтган профессионал бокс оқшомида Хосе Ривас (18-13-4, 10КО)га қарши рингга кўтарилган ва рақибини муддатидан аввал мағлубиятга учратганди. Дўсматов проф рингда 4 та жанг ўтказиб, барчасини муддатидан олдин ғалаба билан якунлаган.