Ҳасанбой Дўсматов шу ой Москвада рингга чиқади + ФОТО

Дўсматов 28 август куни Россия Федерацияси пойтахти Москва шаҳрида ташкил этиладиган профессионал бокс кечасида рингга кўтарилади. Ҳозирча рақиб номи ташкилотчилар томонидан ошкор қилинмаган. 

Бу Ҳасанбой учун проф фаолиятидаги тўртинчи жанг бўлади. У охирги жангини 3 апрель куни "Ҳумо Арена"да Мухлис Кизотага қарши ўтказиб, ғалабага эришганди. 10 раундга мўлжалланган жанг вакант бўлиб турган WBA International камари учун кечган ва унда чарм қўлқоп устамиз рақибини учинчи раундда нокаутга учратган эди.   

Москвадаги бокс оқшомининг марказий жанги сифатида Россия чемпионлик камари учун кечадиган Юсуп Кедиев - Гасан Гасанов тўқнашуви кўрсатилган. Ҳасанбой Дўсматовнинг жанги андеркард жангдан аввал бўлиб ўтади. 

Шунингдек, 28 август кунги бокс кечасида ўзбекистонлик боксчилардан Баҳромжон Фозилов, Мирзакамол Неъматов ва Элдор Абдуқодиров ҳам ўз жангларини ўтказишади. Ҳозирча уларнинг рақиблари ҳам маълум эмас.