Ҳасанбой Дўсматов: Узоғи билан тўртинчи жангим WВA камари учун ўтказилади

Рио-2016 Олимпиадаси чемпиони сайтимизга берган интервьюсида ўз режалари билан ўртоқлашар экан, учинчи, узоғи билан тўртинчи жангида WВА чемпионлик камари учун рингга кўтарилишини маълум қилди. 

“Янги йилгача Ўзбекистонда бўламан. Байрамни ўтказгач, яна АҚШга жўнаб кетаман. Учинчи ёки тўртинчи жангим тўлақонли жаҳон чемпионлик камари учун бўлиб ўтади. 2020 йилнинг охирларида бу режани амалга ошириш учун уриниб кўрамиз. Ҳозир WВA камарига таиландлик боксчи эгалик қилмоқда. Менежерларимиз бу борада ҳаракатларни бошлаб юборишган”, - деди Дўсматов. 

Эслатиб ўтамиз, Ҳасанбой Дўсматов дебют жангини Мексиканинг Гуанахуато штати маъмурий маркази ҳисобланган Сан-Мигель-де-Альенде шаҳрида 19 ёшли мезбон босчи Хесус Сервантес Виллануэвага қарши ўтказиб, рақибини иккинчи раунддаёқ кучли зарба эвазига нокаутга учратганди.