"Ҳеч кимдан қўрқмаймиз". Қозоғистонлик мураббий Олимпиада учун имкониятлар ва ўзбек боксчилари билан рақобат ҳақида гапирди

-Галимбек Калиевич, айни пайтда терма жамоа аъзолари тайёргарлиги қай тарзда кетмоқда?

-Барча ўз уйида, индивидуал равишда шуғулланмоқда. Асосийси, очиқ ҳавода ва карантин қоидаларига риоя қилган ҳолда. Мураббийлар штаби барча боксчиларга формани ушлаб туриш бўйича йўриқнома берган. Кимлардир шахсий мураббийи билан бирга шуғулланяпти. 

-Иорданиядаги лицензион мусобақада 2017 йилги жаҳон чемпиони Қайрат Ералиев йўқлигини кўриб, кўпчилик ажабланди.

-У Осиё чемпионатида иштирок этиб, чорак финалда ютқазиб қўйганди. Жаҳон чемпионатида ҳам ўзбекистонлик Мирзаҳалиловга ютқазди. Чорак финалда. Актаудаги турнир давомида -57 кг вазн тоифасида бошқа номзодларни ҳам кўрдик. Улар ичида Серик Темиржанов яхшироқ кўринди. -63 кг вазнда эса ёш Санатали Толтаев бор, бироқ у Актауда Дилмурат Мижитовга ютқазди. У эса ўз навбатида Закир Сафиуллинга имкониятни бой берди. 

-Супероғир вазн тоифасида Конкабаев бор. Унинг азалий рақиби Баҳодир Жалолов проф боксда ҳам рингга кўтарилган ва Олимпия ўйинларида иштирок этмоқчи. Бизда ҳам профессионал боксчиларни терма жамоага жалб этиш режаси бўлдими?

-Яхши савол. Умуман олганда кўп совриндор ўзбек боксчилари океан ортига бориб, проф рингда ўз омадини синаб кўрмоқда. Лекин уларнинг маҳаллий федерация билан келишуви бор - улар йирик турнирларда мамлакатга ёрдам беришади. Биз ҳам қозоғистонлик профессионал боксчилар билан гаплашдик. Улар орасида Данияр Елеусинов, Садриддин Ахмедов, Жанибек Алимханулилар бор. Уларга мамлакат чемпионатида иштирок этиб, терма жамоа сафига кириш учун нималарга қодир эканликларини кўрсатиш мумкинликлари ҳақида айтдик.  Улар промоутерлик компаниялари билан шартномада кўплаб мажбуриятлари бор эканлиги ҳақида жавоб беришди.  

-Мухлислар орасида кўплаб баҳс-мунозараларга сабаб бўладиган савол: ким кучли? Қозоғистон ёки Ўзбекистон бокси? Ушбу савол жонингизга тегиб кетмадими? Ёки аксинча, бу сизга мотивация бағишлайдими?

-Ўйлайманки, бу мураббий ва боксчилар учун мотивация беради. Рақобат кўп йиллардан буён давом этади. Бироқ шунга қарамай, биз Ўзбекистон терма жамоаси мураббийлари билан яхши муносабатдамиз, қўнғироқлашиб турамиз. Боксчилар рингга чиққан пайтда дўстлик ҳам тугайди. Қўшма йиғинлар? Режада бор. Ўзбек мураббийлари билан бу борада гаплашганмиз. Ҳозирча бундай йиғин қачон ва қаерда ўтказилиши ҳақида айтиш қийин. Биз доимо ҳамкорлик қилишга тайёрмиз ва хеч кимдан қўрқмаймиз. Ким кучли эканлигини фақатгина ринг кўрсатади.