Ҳикматуллоҳ Тўраев: "Мақсадимиз - чемпионлик!"

Бизнинг вақт билан бугун тонгда Япония пойтахтига етиб борган терма жамоамиз куннинг иккинчи ярмида машғулот ўтказди. Эртага тарозидан ўтиш ҳамда қуръа ташлаш маросимлари бўлиб ўтади. 

"Жаҳон чемпионатига тайёргарлик кўнгилдагидек бўлди. Иқлим шароитига мослашиш учун мусобақа стартидан 10 кун олдин Кунчиқар юртга етиб келгандик. Бир ҳафта давомида Майдзуру шаҳрида ўқув-машғулот йиғинини ўтказдик. Ўз олдимизга улкан мақсадлар қўйганмиз. Ҳар биримиз Ўзбекистонга мусобақа медаллари билан қайтмоқчимиз. Ҳа, жаҳон чемпионати дзюдо ватанида бўлиб ўтади. Лекин бу ҳолат бизни асло чўчитаётгани йўқ. Халқимиз дуо қилиб турса, она Ватанга ёруғ юз билан қайтамиз", - дейди -73 кг вазн тоифасида юртимиз шарафини ҳимоя қилувчи полвонимиз Ҳикматуллоҳ Тўраев. 

Таъкидлаш жоиз, жаҳон чемпионатида энг кўп иштирокчи айнан шу вазн тоифасида жам бўлган. Тўқсон икки нафар полвон жаҳон чемпионати медаллари ҳамда Токио-2020 Олимпиадаси медаллари учун баҳсларга киришади. Озарбайжонлик Рустам Оружов -73 кг вазн тоифаси етакчиси ҳисобланади. Кейинги ўринларни Лаша Шавдатуашвили (Грузия), Томми Масиас (Швеция), Ҳидаят Хейдаров (Озарбайжон), Акил Гжакова (Косово), Артур Маргелидон (Канада), Одбаяр Ганбаатар (Мўғулистон), Тохар Бутбул (Исроил) каби машҳур дзюдочилар банд этишган.