“Humo Arena” муз саройининг очилишига бағишланган тадбир ўтказилди

Жисмоний тарбия ва спорт вазирлиги матбуот хизматининг хабар беришича, тадбирда мамлакатимизнинг барча етакчи ОАВ ходимлари, шунингдек ўнлаб хорижий журналистлар ҳам иштирок этди. Дастлаб спикерлар – Жисмоний тарбия ва спорт вазири Дилмурод Набиев, Ўзбекистон хоккей федерацияси вице-президенти Баҳодир Ғафуров, “Humo Arena” муз саройи тантанали очилиш маросими ташкилотчиси Мадина Турсунова, Миллий Олимпия қўмитаси Бош котиби Жасур Матчанов, Ўзбекистон электрон ОАВ миллий ассоциацияси раиси Фирдавс Абдухолиқов, шунингдек мажмуа қурилиши учун масъул бўлган компаниялар вакиллари сўзга чиқиб, иштирокчиларга муз саройининг аҳамияти, унинг техник имкониятлари, оммавий ва профессионал спортни ривожлантиришдаги ўрни ҳамда “Humo Arena” муз саройининг тантанали очилиши билан боғлиқ жиҳатларга тўхталиб ўтди.

Жумладан, Жисмоний тарбия ва спорт вазири Д.Набиев мамлакатимизда спортнинг қишки турларини ривожлантириш ва янада оммалаштиришга алоҳида эътибор қаратилиши натижасида бу борада юртимизда улкан ўзгаришлар рўй бера бошлаганини алоҳида таъкидлади:

- Халқаро талаблар даражасидаги, бетакрор дизайни, кенг имкониятлари ва кўп қирралилиги билан Марказий Осиёда ягона, дея эътироф этилаётган мазкур мажмуанинг ишга туширилиши Ўзбекистонимизда яшаётган ҳар бир юртдошимиз қалбида фахр ҳиссини уйғотиши шубҳасиз. Ишонамизки, “Humo Arena” минглаб ёшларимизни ўз бағрига чорлаб, фарзандларимиз ҳар томонлама соғлом бўлиб тарбияланишига, улар орасидан юзлаб маҳоратли спортчилар етишиб чиқишига хизмат қилади, – дея ўз сўзини якунлади Д.Набиев.

Шундан сўнг мутахассислар журналистларни қизиқтирган саволларга батафсил жавоб берди.

Пресс-конференцияда яна бир эътиборли воқеа рўй берди. Ўзбекистон Республикаси Жисмоний тарбия ва спорт вазирлиги ҳамда Ўзбекистон электрон ОАВ миллий ассоциацияси ўртасида “Ўзбекистонда соғлом турмуш тарзини кенг тарғиб қилиш, аҳолини жисмоний тарбия ва оммавий спортга жалб этиш бўйича ҳамкорлик тадбирларини амалга ошириш тўғрисида”ги Меморандум имзоланди.