"Ҳумо" ҳимоячиси Марк Рубинчик ва ҳужумчи Жавоҳир Расулов жароҳат олиб сафдан чиқди

Айни дамда хоккей бўйича Қозоғистон Про-Лигасида иккинчи ўринда бораётган Тошкентнинг "Ҳумо" хоккей клуби жароҳатланган хоккейчилари бўйича маълумот берди.

Унга кўра, 96-рақамли ҳимоячи Марк Рубинчик танасининг паст қисмидан оғир жароҳат олган ва у тикланиш жараёнида. Матбуот хизмати тарқатган маълумотга кўра, Рубинчик бу мавсумда бошқа музга чиқа олмайди.

Бундан ташқари, 66-рақам эгаси, ўзбекистонлик хоккейчилардан бири Жавоҳир Расулов ҳам танасининг паст қисмидан жароҳат олган ва у камида 3 ҳафтани ўтказиб юборади.

"Ҳумо" хоккей клуби Про-Лигадаги навбатдаги ўйинини 9 декабрь куни Тошкентда "Арлан" жамоасига қарши ўтказади. "Қанотлилар" айни дамда мусобақа жадвалининг иккинчи поғонасидан ўрин олган.