Ҳумоюн Султонов биринчи ракеткани мағлуб этди

Мукофот жамғармаси 36 900 евродан иборат ушбу турнирда ҳамюртимиз Ҳумоюн Султонов ҳам иштирок этяпти. Қувонарлиси, мамлакатимизнинг биринчи ракеткаси илк даврада турнирда биринчи рақам остида сараланган аргентиналик Марко Трунгеллитини мағлуб этишни уддалади. 

Икки соату 25 дақиқа давом этган баҳсда Султонов иродали ғалабага эриша олди - 3/6, 7/6(4), 6/2. Иккала теннисчи ҳам 5 тадан эйс зарбасини амалга оширган. Қўшхатолар Ҳумоюнда кўпроқ бўлди - 3 га 1. Бу теннисчиларнинг ўзаро ўтказган илк учрашуви эди. 

Таққослаш учун, Марко Трунгеллити айни пайтда дунёнинг 151-ракеткаси бўлиб турибди. Султонов эса ATP рейтингида 309-поғонадан жой олган. Бугун теннисчимиз 1/8 финалда италиялик Лоренцо Жустинога қарши кортга чиқади. Бу теннисчи рейтингда 343-ўринни банд этган.