28 июн 11:11
Янгиликлар

Теннис

Ҳумоюн Султонов Брюссель турнирида 1/4 финалга чиқди

Бельгиянинг Брюссель шаҳрида теннис бўйича М25 тоифасига кирувчи теннис турнири бўлиб ўтмоқда.

Мукофот жамғармаси 25 000 АҚШ долларини ташкил этувчи ушбу мусобақада ҳамюртимиз Ҳумоюн Султонов ҳам муваффақиятли одимлаяпти. Мамлакатимизнинг биринчи ракеткаси илк даврада бельгиялик Килиан Коллигнонни 6/3, 6/2 ҳисобида таслим этганди.

Ҳумоюн 1/8 финалда яна бир мезбон теннисчи Харолд Хуэнсга қарши кортга чиқди ва рейтингнинг 1915-поғонасида бораётган рақибини ортиқча қийинчиликсиз мағлубиятга учратди - 6/1, 6/1.

Брюссель турнирида учинчи рақам остида таснифланган Султонов бугун 1/4 финалда норвегиялик Виктор Дурасовичга қарши баҳс олиб боради. Скандинавиялик теннисчи ATP рейтингида 508-поғонадан жой олган. Ҳумоюн эса 330-ўринни эгаллаб турибди.