Ҳумоюн Султонов фаолияти давомида илк бор "Катта дубулға" туркумидаги мусобақада ғалаба қозонди

Хабарингиз бор, бугун Австралиянинг Мельбурн шаҳрида теннис бўйича "Катта дубулға" туркумидан ўрин олган Австралия Очиқ чемпионати старт олди.

Аҳамиятлиси, бу йилги турнирда Ўзбекистоннинг биринчи рақамли теннисчиси Ҳумоюн Султонов ҳам иштирок этмоқда. У бугун квалификациянинг илк раундида колумбиялик Даниэль Элахи Галанни 2:1 (6/3, 6/7(2), 7/5) ҳисобида таслим этди.

Бу Ҳумоюннинг фаолиятидаги илк "Катта дубулға" турнири саналади. Шундай экан, 26 ёшли ҳамюртимиз дебютни ғалаба билан бошлай олгани эътиборга молик.

Ўзбекистонлик теннисчилардан сўнгги бор Денис Истомин "Катта дубулға" мусобақаларида баҳс олиб борганди. Унинг Австралия Очиқ чемпионатидаги охирги иштироки 2021 йилга тўғри келади.

Маълумот учун, саралашнинг иккинчи босқичида Султонов чехиялик Далибор Сврчина билан тўқнаш келади. 

Таққослаш учун, Ҳумоюн ATP рейтингида 215, Свричина эса 228-ўриндан жой олган.