13 июл 08:14
Янгиликлар

Теннис

Ҳумоюн Султонов Германия турнирида 1/2 финалга чиқди

Шу кунларда Германиянинг Кассель шаҳрида теннис бўйича ITF туркумига кирувчи "M25 Kassel" турнири бўлиб ўтмоқда.

Унда Ўзбекистоннинг биринчи ракеткаси Ҳумоюн Султонов ҳам муваффақиятли одимлаяпти. ATP рейтингида 309-ўринни эгаллаб турган ҳамюртимиз 1/4 финалда британиялик 23 ёшли Антон Матусевичга қарши кортга чиқди. Бир соату 47 дақиқа давом этган баҳсда Ҳумоюн 6/4, 7/5 ҳисобида зафар қучди.

Таққослаш учун, инглиз теннисчи ATP рейтингининг 433-поғонасидан жой олган. Бугун Султонов финал чиптаси учун турнирнинг иккинчи ракеткаси, бельгиялик Гутьер Онклинга қарши кортга чиқади. Бу теннисчи ҳозирда дунё рейтингида 259-ўринни эгаллаб турибди. Онклин - Султонов баҳси бизнинг вақт билан соат 17:30да бошланади.