Ҳумоюн Султонов ирода кўрсатиб, Германия турнирида ҳам финалга йўл олди!

Аввалроқ, мусобақада иштирок этаётган Ўзбекистоннинг биринчи рақамли теннисчиси Ҳумоюн Султонов ҳам ярим финалга чиққани ҳақида хабар берган эдик.

Султонов бугун финал чиптаси йўлида белгиялик Готье Онклинга қарши кортга чиқди. 2 соат-у 35 дақиқага чўзилган ўйин ғолиби уч сетда аниқланди. Унда Ҳумоюн Султонов камбэк эвазига зафар қучди — 4:6, 6:3, 6:4.

Маълумот учун, Ҳумоюн Султонов айни дамда ATP рейтингида 309-ўринни банд этиб турибди. Белгиялик теннисчи эса дунё рейтингида 259-ўринда эди.

Эртага наманганлик теннисчимиз мукофот жамғармаси 25 000 долларни ташкил этувчи M25 Kassel турнирининг финалида кортга чиқади. Унга бу йўлда яна бир Бельгия вакили — Рафаэль Коллинон (ATP-258) рақиб бўлади. Ўйин Тошкент вақти билан 13:00 да старт олиши белгиланган.

Эслатиб ўтамиз, Ҳумоюн июль ойи бошида Бельгиянинг Брюссель шаҳрида ташкил этилган M25 турнирида қатнашиб, финалга қадар етиб борган эди ва вице-чемпионга айланган эди.