23 ноя 14:15
Янгиликлар

Теннис

Ҳумоюн Султонов Калабурагида бош соврин учун кортга чиқади

Хабарингиз бор, шу кунларда Ҳиндистоннинг Калабураги шаҳрида теннис бўйича ITF турнири бўлиб ўтмоқда.

Мукофот жамғармаси 25 000 АҚШ долларини ташкил қилувчи турнирда ҳамюртимиз Ҳумоюн Султонов ҳам муваффақиятли одимлаяпти. Мамлакатимизнинг биринчи ракеткаси M25 тоифасига кирувчи ушбу турнирда ҳам биринчи рақам остида сараланган.

Бироз аввал якунига етган 1/2 финал учрашувида Султонов қийинчилик билан ғалабага эришди. У 1 соату 52 дақиқа давом этган баҳсда еттинчи рақам остида таснифланган ҳиндистонлик Дев Жавияни 7/6(5), 6/2 ҳисобида мағлубиятга учратди.

Иккинчи ярим финал баҳсида эса россиялик Богдан Бобров АҚШ вакили Ник Чаппеллдан ортиқча қийинчиликсиз устун келди - 6/3, 6/0.

Таққослаш учун, Султонов ATP рейтингида 230, Дев Жавия 689, турнирнинг иккинчи ракеткаси бўлган Бобров эса 410-поғонани банд этган.