Ҳумоюн Султонов President's Cup финалида!

Мукофот жамғармаси 40 минг АҚШ долларини ташкил этувчи мусобақада иккинчи ракеткамиз Ҳумоюн Султонов ҳам муваффақиятли одимлаяпти. Дунёнинг 550-ракеткаси бўлиб турган Султонов бироз аввал якунига етган 1/2 финал учрашувида ортиқча қийинчиликсиз ғалабага эришди. 

Ҳамюртимиз 75 дақиқа давом этган баҳсда россиялик Евгений Карловскийни 6/3, 6/1 ҳисобида мағлубиятга учратди. Бу билан Султонов теннисчиларнинг ўзаро учрашувларидаги ҳисоб мувозанатини ҳам тиклади - 1:1. Карловский 3, Султонов 9 та эйс зарбани амалга оширди. Ҳумоюн қўшхатога йўл қўймади ва аксинча 4 та брейкка эришди. 

Ҳумоюн Султоновнинг финалдаги рақиби айни дақиқаларда ўтказилаётган қозоғистонлик Денис Евсеев ҳамда туркиялик Янки Эрель ўртасидаги учрашувдан сўнг маълум бўлади. Биринчи сетнинг олтинчи геймидан сўнг (3/3) ушбу баҳс ёмғир сабаб тўхтатилди.