Ҳумоюн Тўхтамуродов озод этилдими? У Instagram'ига янги пост жойлади ва мухлисларига мурожаат қилди

Олдинроқ, спортчининг инста аккаунти буткул йўқолиб қолгани ҳақида хабар берган эдик.

Аммо кеча Тўхтамуродовнинг Instagram тармоғидаги расмий саҳифаси қайта ишга тушди. Ҳумоюн Тўхтамуродов номидан юритилаётган ушбу аккаунтга янги пост жойланди ва унда спортчининг мухлисларига мурожаати акс этди:

"Барчага Ассалому Алайкум!

Қудрати ва Адолати бутун дунёга донг урган Ўзбекистон ватанимга киндик қоним тўкилган кундан бошлаб, шу меҳрибон Ўзбек халқим учун, Аллоҳим назари тушган Юртбошим учун фидоий бўлиб туғилганимни ва шу йўсинда яшаб ўтишим кераклигини ҳис қилганман!

Байроғи елкам узра ҳилпираб турган пайт Азиз Ватаним, бутун она халқим қўллаб-қувватлагани каби мен ҳам шу халқ учун, Ўзбекистон учун жонимни ҳар он беришга тайёрман!

Мен Ҳумоюн Тўхтамуродов, шу буюк юрт байроғини дунё узра кўтарилишида оз бўлса-да ҳисса қўшишни олий мақсад билган оддий халқ ичидан чиққан, Ватанга муҳаббати чексиз спортчиман!

Мени ҳеч қандай жиноятчи гуруҳлар, қонунбузарлар билан алоқам йўқ! ОАВда мен ҳақимда айтилган гумонларнинг барчаси асоссиз! Янги Ўзбекистонда қонун устувор! Бу юрт нон-сувини, меҳрини ичиб яшаган ҳар бир инсон бу юрт қонунларига ҳам амал қилиб яшаши шарт!

Мен учун ҳавотир олган, дуо қилган суюкли халқимга миннатдорчилик билдираман! Келажакда бутун дунё бўйлаб Ватаним байроғини муносиб ҳимоя қилишга ваъда бераман! Олға Ўзбекистоним",  дейилади мурожаатда.