Ҳуқуқни муҳофаза қилувчи органлар ходимлари ўртасида енгил атлетика мусобақа ўтказилди

Янги номларни кашф этиш, терма жамоамиз учун муносиб номзодларни саралаб олиш мақсадида турли селекцион мусобақалар ташкил қилинмоқда. Ана шундай турнирларнинг навбатдагиси бугун, 10 декабрь куни Республика ихтисослаштирилган олимпия захиралари мактаб-интернатининг енгил атлетика манежида ўтказилди.

Мусобақанинг тантанали очилиш маросимида Ўзбекистон Миллий олимпия қўмитаси Бош котиби Жасур Матчанов, Ўзбекистон енгил атлетика федерацияси раиси Андрей Абдувалиев ва бошқалар иштирок этишди. Тадбир давомида Жасур Матчанов сўзга чиқар экан, ҳуқуқни муҳофаза қилувчи органлар ходимлари доимо юқори жисмоний тайёргарликка эга эканликлари, терма жамоамиз аъзоари орасида ҳарбий спортчиларнинг алоҳида ўрни борлигини қайд этиб ўтди.

Шундан сўнг Ўзбекистон Республикаси давлат мадҳияси янгради ва мусобақа расман очиқ деб эълон қилинди.

Турнирда Ўзбекистон Республикаси давлат хавфсизлик хизмати, Мудофаа вазирлиги, Миллий гвардия, Ички ишлар ходимлари иштирок этишди. Конституция кунига бағишлаб ўтказилган мусобақада иштирокчилар 60 метр, 200 метр, 400 метрга югуриш, ядро улоқтириш, узунликка сакраш ва баландликка сакраш йўналишларида совринли ўринлар учун кураш олиб бордилар.

Баҳслар якунига кўра кучли учликка кира олган спортчилар Миллий олимпия қўмитасининг қимматбаҳо совғалари билан тақдирланишди.