IBА раҳбарлиги учун сайлов қоидаларини бузганликда айбланган Умар Кремлёв оқланди

"Барча мавжуд ҳужжатлар ва маълумотларни синчковлик билан таҳлил қилгандан сўнг, BIIU жаноб Умар Кремлёвга қўйилган барча айбловларни олиб ташлашга қарор қилди", — дейилади IBА матбуот хизмати баёнотида.

Эслатиб ўтамиз, Кремлёв 14 май куни Истанбулда (Туркия) бўлиб ўтган ташкилотнинг навбатдан ташқари конгрессида IBА президенти лавозимига қайта сайланган эди. Борис ван дер Фёрст сайловларда россияликнинг рақиби бўлиши керак эди, аммо сайловлар арафасида у четлатилганди.

Спорт арбитраж суди (CАS) 14 июнь куни голландияликнинг апелляциясини кўриб чиқиб, сайловга қўйилишига таъсир қилмайдиган кичик қоидабузарликка йўл қўйганини айтган. Шунингдек, Кремлёв ҳам худди шундай қоидабузарликка йўл қўйгани қайд этилган.