“Ичан қалъа” бўйлаб соғлом ҳаёт учун 5000 қадам ФОТОРЕПОРТАЖ

Ўзбекистон Республикаси Жисмоний тарбия ва спорт вазирининг 2020 йил 9 июндаги “COVID-19 пандемияси даврида ҳудудларда спорт турлари бўйича машғулотлар, мусобақалар ҳамда ўқув-машғулот йиғинларини ташкил этиш тўғрисида”ги буйруғига асосан, Хоразм вилоятида санитария қоида ва меъёрларига риоя қилинган ҳолда тегишли ишлар амалга оширилаётир. 

Жумладан, Хива шаҳрида “Соғлом ҳаёт учун 5000 қадам” шиори остида пиёда юриш бўйича уюштирилган марафон ҳам ана шулар сирасига киради.

Таъбир жоизки, Хоразм  вилояти Жисмоний тарбия ва спорт бошқармаси томонидан уюштирилган  мазкур тадбир эрталабки бадантарбия машғулоти билан бошланди. Қадимий шаҳарнинг меъморчилик ёдгорлиги – “Ота дарвоза” олдида ташкил этилган бадантарбия машқларини спорт фахрийлари ва спортсеварлар фаоллик билан бажариб, саломатликларини янада мустаҳкамлашди.

Сўнгра, тадбир иштирокчилари биргаликда “Очиқ осмон остидаги музей-шаҳар” таърифини олган Хиванинг “Ичан қалъа” давлат музей қўриқхонаси бўйлаб белгиланган масофани байрамона кўтаринкилик ва хуш кайфиятда босиб ўтишди. Бу билан улар пиёда юришнинг фойдасини, соғлом турмуш тарзини тарғибот қилишиб, жисмоний тарбия ва спорт билан ҳамнафас эканлигини исботлашди.

Икром ХУДОЙБЕРГАНОВ тайёрлади (Хива, Хоразм)