Икки боксчимиз камар учун жанг қилиш мақсадида Вьетнамга жўнаб кетди + ФОТО

"Cоcky Buffalo Promoutions" компанияси 23 апрель куни Вьетнамнинг Хошимин шаҳрида профессионал бокс кечасини ташкил этади. Мазкур оқшом доирасида промоушен билан шартномаси бор чарм қўлқоп усталаримиз Олимжон Назаров (50,8 кг) ҳамда Абдурасул Исмоилов (61,2 кг) навбатдаги жангларини ўтказади.

Исмоилов (9-1, 5КО) филиппинлик Аржи Токуэро (13-5-3, 10КО)га қарши вакант бўлиб турган WBO Oriental камари учун жанг қилади.

Назаров (25-5 15КО) эса бошқа бир филиппинлик боксчи Херме Балоро (6-1, 4КО)га қарши рингга чиқади. Ушбу жанг ҳамюртимизга тегишли WBO Oriental камари учун кечади. Ўта енгил вазн тоифасида ўз жангларини ўтказиб келаётган Назаров айни пайтда WBО рейтингида 7-ўринни эгаллаб турибди.

Маълумот учун, Олимжон Назаров бундан аввалги жангини ўтган йилнинг 23 октябрь куни Жанубий Кореанинг Сеул шаҳрида филиппинлик Майкл Мендоза (14-12-1-1, 4 КО)га қарши ўтказганди. Ўшанда 12 раунд тўлиқ давом этган жангда ҳакамлар бир овоздан 115:113 ҳисобидаги ғалабани Назаровга тақдим этишган эди.

Бироз аввал Набижон Исманов ва Бахтиёр Маҳкамов бошчилигидаги боксчиларимиз Туркиянинг Истанбул шаҳрига жўнаб кетишди. У ердан делегациямиз Вьетнам давлатига етиб боради.