13 окт 15:53
Янгиликлар

Дзюдо

Икки дзюдочимиз Абу-Даби "Катта Дубулға" турнири бронза медали учун татамига чиқади

БАА пойтахти Абу-Даби шаҳри мезбонлигида ўтаётган дзюдо бўйича "Катта Дубулға" туркумига кирувчи турнирнинг учинчи кунги саралаш беллашувлари якунланди.

Мукофот жамғармаси 154 000 еврони ташкил қилувчи мусобақанинг бугунги дастурида 8 нафар дзюдочимиз баҳсларга киришганди. Улардан икки нафари кечки финал дастурида бронза медали учун татамига чиқадиган бўлди.

Нурбек Муртозоев (-90 кг) илк даврада филиппинлик Кен Дакасинни, иккинчи босқичда франциялик Лорис Тассиерни, 1/4 финалда венгриялик Петер Сафранини мағлубиятга учратди. Ярим финалда IJF байроғи остида курашаётган россиялик Мансур Лорсановга ютқазиб қўйди. Энди у бронза медали учун бразилиялик Жовани Феррейрага қарши баҳс олиб боради.

Ўткирбек Тўрабоев (+100 кг) эса қозоғистонлик Мади Едилбаевни енгди. Чорак финалда нидерландиялик тажрибали Йелле Сниппега ютқазиб қўйди. Бронза медали йўлидаги ўтиш беллашувида сербиялик Игор Врачардан устун келди. Ўткирбек кечки дастурда россиялик таниқли дзюдочи Тамерлан Башаевга қарши татамига чиқади.

Қолган дзюдочиларимиз Жалолиддин Қурбонмуродов (-90 кг), Зуфарбек Ўролов ва Эрназар Сарсенбаев (иккаласи ҳам -100 кг), Муҳаммадқодир Мансуров (+100 кг) саралаш баҳсларида, Фотима Қурамбоева ва Дурдона Низомаддинова (+78 кг) бронза йўлидаги ўтиш беллашувида рақибларига имкониятни бой беришди.

Эслатиб ўтамиз, ҳозирча мусобақанинг биринчи куни Муҳриддин Тиловов томонидан қўлга киритилган бронза медали ягоналигини сақлаб турибди.