Икки курашчимиз Президент соврини учун ўтказилган турнир чемпиони, яна бирида кумуш!

Ўзбекистон Республикаси Президенти соврини учун Паҳлавон Маҳмуд хотирасига бағишлаб ўтказилган халқаро турнирда дунёнинг кўплаб давлатларидан келган сара курашчилар 2 та (-90 ва +90 кг) вазн тоифасида гиламга чиқди. Юртимиз шарафини Ризамат Солиев мураббийлигидаги терма жамоамизнинг 4 нафар курашчиси ҳимоя қилди. 

Бироз аввал 50 000 томошабинни ўз бағрига сиғдира олувчи "Zeinal-Khan Traditional Wrestling Arena"да ҳал қилувчи финал беллашувлари ўтказилиб, барча ғолиб ва совриндорлар номи маълум бўлди. Мутлақ вазнда ўтган финал баҳсида терма жамоамизнинг икки вакили Асрор Ҳамидов ва Муҳсин Ҳисомиддинов рўбарў келди. Бу беллашувда тажриба ўз сўзини айтди. Муҳсин полвон чемпион, Асрор полвон эса кумуш медални қўлга киритди. Яна бир курашчимиз Алихон Нодиров (-90 кг) ҳам чемпионлик шоҳсупасига кўтарилди. 

Маълумот учун, мусобақанинг умумий мукофот жамғармаси 10 000 АҚШ доллари бўлиб, ғолиблар 3000 долларга эга бўлди. Кумуш медаль соҳиблари 1000, бронза медалга эга чиққанлар ўз ҳамёнларини 500 долларга бойитиб олишди.