10 сен 09:36
Янгиликлар

Теннис

Икки нафар ўзбек теннисчиси Япония мезбонлик қиладиган Roland Garros Junior Series финал босқичида иштирок этади

Ўзбекистонлик икки ракетка устаси жорий йил октябрь ойида Японияда бўлиб ўтадиган нуфузли Roland Garros Junior Series турнирининг финал босқичида иштирок этиш ҳуқуқини қўлга киритди.

Мусобақада Ўзбекистон шарафини Акмал Абдуллаев ва Алан Зиннатуллин ҳимоя қилади.

Абдуллаев Олма-ота шаҳрида ўтказилган саралаш босқичида финалга чиқиб, йўлланмани қўлга киритганди.

Зиннатуллинга эса Осиё теннис федерацияси (ATF) томонидан wild-card берилди. Шу тариқа, икки нафар ўзбекистонлик ўсмир теннисчи турнирнинг ҳал қилувчи босқичида иштирок этадиган бўлди.

Roland Garros Junior Series финали Японияда бўлиб ўтади ва бу босқич 2026 йилда Францияда ўтказиладиган Roland Garros — дунёнинг энг йирик ўсмирлар ўртасидаги турнирларидан бирига йўл очувчи муҳим қадамлардан бири ҳисобланади. Турнир ғолиблари Париждаги афсонавий кортларда ўз кучини синаб кўриш имкониятига эга бўлади.