Икки очколик фарқ билан чемпион бўлган Абдусатторов London Chess Classic турниридан қанча пул мукофоти ишлаб олди?

Мукофот жамғармаси 50 000 фунт стерлингни ташкил этувчи ушбу нуфузли мусобақада дунёнинг кўзга кўринган 10 нафар шахматчиси қатори ёш гроссмейстеримиз Нодирбек Абдусатторов ҳам муваффақиятли қатнашди. Ҳамюртимиз муддатидан аввал мусобақа чемпионлигини нақд қилгани ҳақида хабар берган эдик. 

Абдусатторов сўнгги 9-турда оқ доналарда украиналик гроссмейстер Павел Эльяновга қарши баҳс олиб борди ва дуранг натижа қайд этди. Сўнгги турнинг барча учрашувларида томонлар муросага келишган. Нодирбек турнирни мағлубиятсиз якунлади - 6 ғалаба ва 3 дуранг. Тўққиз имкониятдан 7,5 очко жамғарган шахматчимиз энг яқин таъқибчиси билан ўртадаги икки очколик фарқни сақлаб қолди. 

Турнирда биринчи рақам остида сараланган франциялик Алиреза Фирузджа 5,5 очко билан иккинчи ўринни эгаллади. Беш очкога эга англиялик Никита Витюгов кучли учликка якун ясади. Абдусатторов чемпион учун ажратилган 25 000 фунт стерлинг мукофот пулига эга бўлди. Алиреза бу турнирдан 15, Никита эса 10 минг фунт стерлинг ишлаб олди.