Икки Олимпиада чемпиони қатнашган тадбирда балиқчилик ёшларга янги оғир атлетика зали совға қилинди ФОТОГАЛЕРЕЯ

Ўзбекистон оғир атлетика федерацияси, Андижон вилояти, Балиқчи туман ҳокимлиги ҳамда бир қатор ҳамкорларнинг ташаббуси билан туманда янги оғир атлетика спорт зали фойдаланишга топширилди.

Ушбу мажмуанинг тантанали очилиш маросими янги йил шодиёналарига ҳамоҳанг тарзда байрамона руҳда ташкил этилди.

Оғир атлетика спорт тури билан шуғулланиш учун халқаро талабларга жавоб берадиган зарур спорт жиҳозлари билан таъминланган мажмуанинг очилиш маросимида Ўзбекистон оғир атлетика федерацияси раисининг биринчи ўринбосари Шахрулло Маҳмудов, Балиқчи тумани ҳокими Жасурбек Абдураимов, "SAMO" компанияси бош директори, сенатор Акромжон Ғаниев, Рио Олимпиадаси чемпиони Руслан Нурудинов, Токио Олимпиадаси ғолиби, катталар ўртасида жаҳон чемпиони, 2021 йилнинг энг яхши спортчиси сифатида Ўзбекистон миллий кубоги соҳиби Акбар Жўраев ва бошқа таниқли спортчилар, уларнинг мураббийлари, кенг жамоатчилик вакиллари, бўлғуси чемпионлар, ота-оналар, Балиқчи туман спорт соҳаси вакиллари иштирок этишди.

Ўзбекистон Республикаси Президенти Шавкат Мирзиёевнинг кўрсатмаси ва алоҳида эътибори туфайли мамлакатимизнинг чекка-чекка туманларида, маҳаллаларида замон талабларига мос спорт мажмуаларини бунёд этиш, эртага Ватан довруғини дунё майдонларида тараннум этадиган ёш спортчиларга муносиб шарт-шароитлар яратиш Янги Ўзбекистон пойдеворини мустаҳкамлашда муҳим омиллардан бири саналади.

Шу маънода, ажратилган 1 миллиарддан зиёд маблағ эвазига Балиқчидаги Болалар-ўсмирлар спорт мактабида янги спорт залининг ишга туширилиши нафақат ёшларнинг, балки ҳудуддаги кенг спорт жамоатчилигининг қувончига ҳам сабаб бўлди.

- Авваллари ушбу масканда шарт-шароитларнинг етарли эмаслиги сабабли оғир атлетика билан шуғулланувчилар сони 100 нафар атрофида бўларди. Ўзбекистон оғир атлетика федерацияси ва ташаббускорларнинг қўллаб-қувватлаши билан бу ерда замонавий мажмуага асос солиниши, энг сўнгги русумдаги спорт анжомлари билан таъминланиши натижасида келгуси йилдан машғулотларга келувчилар сафи янада кенгайиши шубҳасиз. Бу эса туманимиздан етишиб чиққан Токио Олимпиадаси рекордчиси Муаттар Набиева каби Ватанимиз шаъни учун фидойилик кўрсатадиган спортчилар сафининг янада кенгайишига олиб келади. Асосийси, яратилган шарт-шароитлар аҳолининг жисмоний тарбия ва спортга қизиқишини оширади. Спортга қизиқиш кучли бўлган жойда сўзсиз ривожланиш, янги ғалабалар сари талпиниш бўлади, - дейди Балиқчи туман ҳокими Жасурбек Абдураимов.

Спорт залининг очилиш маросимида Ўзбекистон оғир атлетика федерацияси ҳамда "SAMO" компанияси томонидан ушбу кўркам спорт мажмуасини бунёд этишда фаол иштирок этган ишчи-хизматчиларга, ёш спортчиларга, уларнинг мураббийларига Ўзбекистоннинг довруғли спортчилари Акбар Жўраев ва Руслан Нурудинов янги йил олдидан эсдалик совғаларини тақдим этди.

Тадбир давомида жаҳон спорт майдонида ўз ўрнига эга бўлган шавкатли спортчиларимиз ёш издошларига маҳорат сабоқларини ўтказишди. Истеъдодли ёш спортчилар ўз навбатида дунё тан олган чемпионлар олдида оғир атлетика бўйича ўз чиқишларини амалга оширишди.

Муҳими, ёшлар, балиқчиликлар хурсанд бўлишди. Яқин келажакда балиқчилик ёшлар орасидан Акбар ва Русландек чемпион бўламан, жаҳон спорт майдонларида Ўзбекистон байроғини юксалтираман, деган орзулари бир дунё талантарнинг, уларнинг ота-оналарининг қалб қўрида ёруғ нурлар жилоланди.

Тўлқин Рўзиев тайёрлади