Икки теннисчимиз Фарғона “Челленжер”и турниридаги иштирокини якунлади

Асосий тўрда 5 нафар теннисчимизнинг иштирок этиши ҳақида хабар берган эдик.

Улардан Ҳумоюн Султонов ва Шониғматжон Шофайзиев илк даврадаёқ ўз иштирокларини якунлашди. Асосий тўрга имтиёзли равишда қўйилган Султонов сербиялик Никола Миложевичга 4:6, 2:6 ҳисобида имкониятни бой берди. Шофайзиев эса франциялик Садио Доумбиога 7:6, 4:6, 2:6 ҳисобида ютқазди.

Бугун ҳамюртларимиздан Темур Исмоилов бельгиялик Жульен Дубаилга, Жўрабек Каримов турнирнинг учинчи ракеткаси россиялик Александр Кудрявцевга қарши кортга чиқади. Эртага эса Санжар Файзиев турнирнинг 4-ракеткаси қозоғистонлик Дмитрий Попко билан тўқнаш келади. 

Фарғона “Челленжер”ининг биринчи ракеткаси сифатида россиялик Константин Кравчук қайд этилган. У дунё рейтингида 109-ўринни эгаллаб турибди. Молдовалик Раду Албот иккинчи ракетка бўлиб, ATP рейтингида 113-поғонадан жой олган.

Мусобақа ғолиби 7,200 доллар мукофот пули ҳамда 90 рейтинг очкосига эга бўлади. Финалчи 4,240 доллар ҳамда 55 долларни қўлга киритади. Биринчи даврада кортга чиққан барча теннисчилар ўз ҳамёнларини 520 долларга бойитиб олишади.