Икки юнон-рум курашчимиз Жаҳон чемпионати медали учун курашади

Хабар берганимиздек, кеча дунё биринчилигида юнон-рум курашчилар ўз иштирокларини бошлашди. Кечаги беллашувларда гиламга чиққан 4 ҳамюртимиздан икки нафари бронза медали учун курашиш имкониятини сақаб қолди. 

-55 кг вазн тоифасидаги юнон-рум курашчимиз Алишер Ғаниев халқаро нейтрал спортчи мақомида қатнашаётган россиялик Алибек Амировни 8-0 ҳисобида енгди. Нимчорак финалда япониялик кучли рақиби Коҳеи Ямагива 12-3 ҳисобида таслим этилди. Чорак финалда эса озарбайжонлик Фарид Садиҳлига ютқазиб қўйди. Бугун Ғаниев бронза медали йўлидаги ўтиш баҳсида курашни давом эттиради. Унинг рақиби Венгрия ва БАА вакиллари ўртасидаги беллашувдан сўнг маълум бўлади.  

-63 кг вазн тоифасидаги курашчимиз Ҳусниддин Олимбоев илк даврадаёқ Аҳмадризо Незҳадга ютқазиб қўйди. Эронлик спортчи финалга етиб боргани учун Олимбоевда бронза медали учун курашиш имконияти юзага келди. Бунинг учун у бугун аввалига ўтиш баҳсида ҳиндистонлик Сандипни мағлуб этиши талаб этилади. 

-77 кг вазндаги классигимиз Азимжон Соатиллаев чехиялик Михал Зеленкадан устун келди, аммо кейинги даврада украиналик Руслан Абдиевга ютқазиб қўйди. -87 кг вазнда курашган  Абдуллоҳ Абдумуталлибов биринчи даврадаёқ эстониялик Робин Успенскидан енгилди ва жаҳон чемпионатидаги иштирокини якунлади.