Илия Топурия тилга кирди, у жанг вақти ва рақибни айтди

"El Matador"нинг айтишича, у уч ойдан сўнг октагонга қайтиб, америкалик Жастин Гэтжи ва британиялик Пэдди Пимблетт ўртасида аниқланадиган вақтинчалик чемпионлик камари соҳиби билан бирлаштирувчи жанг ўтказади.

"Апрель-июнь. Пэдди ва Жастин ўртасидаги жанг ғолиби", - деб ёзди испаниялик ижтимоий тармоқда мухлисларнинг саволларига жавоб берар экан.

Топуриянинг баёноти Мераб Двалишвилининг инсайдларига унчалик мос келмайди, у куни кеча дўстининг Ислам Махачев билан жанги ҳамма кутганидан ҳам олдинроқ бўлиб ўтиши мумкинлигини айтганди.

Айни пайтда чемпион собиқ рафиқаси билан муносабатларини судда аниқлаш учун "таътил"га чиққан. Гэтжи ва Пимблетт ўртасидаги жанг эса кейинги ҳафта охирида Лас-Вегас шаҳрида бўлиб ўтадиган UFC 324 турнирининг асосий тўқнашуви бўлади.