"Интер Майами" "Монреаль"ни тор-мор этди. Мессидан покер

Учрашув Флорида жамоасининг 7:1 ҳисобидаги йирик ғалабаси билан якунланди.

Ўйиннинг 20-дақиқасида мезбонларнинг бразилиялик ярим ҳимоячиси Каземиро МЛСдаги фаолиятидаги дебют голини урди. Унга аргентиналик Теласко Сеговия ассистентлик қилди. 17 дақиқадан сўнг меҳмонларнинг германиялик ярим ҳимоячиси Фабиан Герберс швейцариялик Ноя Штрайтнинг узатмасидан сўнг мувозанатни тиклади. Танаффусга қадар юлдузли аргентиналик Лионель Месси ўз жамоасини олдинга олиб чиқди. Иккинчи бўлимда ҳужумчи яна учта гол урди. Унинг голларига бир маротабадан Луис Суарес ва Родриго Де Пауль ассистентлик қилишди. Уругвайлик футболчининг ўзи ҳам гол урди, аммо бу сафар Мессининг узатмасидан сўнг. Ўйиндаги яна бир голга захирадан майдонга тушган америкалик ярим ҳимоячи Александр Шоу муаллифлик қилди, у Эсекьель Абадья-Реданинг узатмасидан сўнг рақиб дарвозасини ишғол этди.

"Интер Майами" МЛСдаги тўртта ўйиндан иборат ғалабасиз сериясига чек қўйди. "Чилангарлар" Шарқий конференцияда 22 ўйиндан сўнг 42 очко жамғариб, иккинчи ўринни эгаллаб туришибди. Монреаль жамоаси эса Шарқнинг охиридан битта юқоридаги 14-поғонасидан жой олган (21 очко).