Интервью. Шаҳрам Ғиёсов финал, "Роналдуча сакраш" ва бошқалар ҳақида

- Ассалому алайкум Шаҳрам. Олимпиаданинг кумуш медали муборак бўлсин!
- Табрик учун катта раҳмат! Фурсатдан фойдаланиб, мени қўллаб-қувватлаб турган барчага ўз миннатдорчилигимни билдириб ўтмоқчиман.

- Финал жанги ҳақида нима дея оласиз? Қозоқ боксчиси нимани ҳисобига ғалаба қозонди?
- Фикримча, унга ушбу жангда омад кулиб боқди :)

- Қўлга киритилган медални кимга бағишлайсиз?
- Авваламбор, мени оқ ювиб, оқ тараб вояга етказган ота онамга. Қолаверса, бутун Олимпиада давомида мени қўллаб-қувватлаб турган юртдошларимга бағишлайман. Уларга бунинг учун катта раҳмат айтиб қоламан. Бу медал бутун Ўзбекистонники. Истиқлолимизнинг 25 йиллиги учун совға.

- Бразилиядаги Олимпиада давомида сиз 5 та жанг ўтказдингиз. Улар орасида амалдаги Олимпиада ва жаҳон чемпионлари ҳам бўлганди. Шуларни ҳисобга олган ҳолда айтингчи, ушбу жанглар орасидаги энг қийини қайси бўлди?
- Ушбу жанглар орасида Олимпиада чемпиони Раниэл Иглесиас ва литвалик Станиосисга қарши жанглар қийинроқ бўлди. Шукрки, жангларда юртдошларимни уялтириб қўймадим.

- Ана энди "Роналдуча сакраш" ҳақида айтиб ўтмасангиз бўлмайди. Бу фикр қаердан келди?  Ғалабани аввал ҳам шундай нишонлаганмисиз?
- Бунгача агар ғалаба қозониб ярим финалга чиқадиган бўлса ғалабани Роналдуга ўхшаб нишонлайман деб ният қилиб қўйгандим.


- Бу "Реал" жамоасининг мухлиси эканлигингиз сабабми ёки Роналдунинг?
- Роналдунинг мухлисиман. Португалиялик футболчининг майдондаги ҳаракатларини кузатиш жуда ёқади.

- Энди қачон Ўзбекистонга қайтасизлар?
- Келаси ҳафта насиб қилса юртимизга қайтиб кетамиз.

- Тушунарли. Яна бир маротаба ушбу муваффақият билан табриклаймиз.
- Раҳмат катта. Эътибор учун барчага миннатдорчилик билдириб қоламан.

Азиз Тўхтамуродов суҳбатлашди