Ишчи гуруҳ Андижондаги чим устида ҳоккей бўйича асосий базанинг бугунги ҳолати билан танишди

Сир эмаски, охирги йилларда жисмоний тарбия ва спортни оммалаштириш, аҳоли ўртасида соғлом турмуш тарзини тарғиб қилиш, имкониятлари чекланган шахсларнинг жисмоний реабилитацияси учун зарур шарт-шароитлар яратиш ҳамда мамлакат спортчиларининг халқаро спорт майдонларида муносиб иштирок этишини таъминлаш борасида изчил чора-тадбирлар амалга оширилмоқда.

Андижон вилоятида жисмоний тарбия ва спортни янада оммалаштириш, бу борада ҳудудлардаги мавжуд шарт-шароитлар билан яқиндан танишиш ва пандемия муносабати билан иш жараёнларини ташкил этишда услубий ёрдам кўрсатиш мақсадида Ўзбекистон Республикаси Жисмоний тарбия ва спорт вазирлиги томонидан тузилган ишчи гуруҳ вилоятда ўз иш фаолиятини давом эттирмоқда.

Кеча ишчи гуруҳ томонидан куннинг иккинчи ярмида Андижон шаҳри бўйлаб жисмоний тарбия ва спорт соҳасида олиб борилаётган ишлар ва спорт мактабларида шуғулланаётган иқтидорли спортчиларни саралаб олиш ҳамда улардан спорт турлари бўйича ҳудудий терма жамоаларни шакллантириш бўйича қилинган амалий ишлар билан яқиндан танишилди.

Ишчи гуруҳ вакиллари, жумладан, Андижон шаҳар спортнинг ўйин турлари ва енгил атлетикага ихтисослаштирилган болалар-ўсмирлар спорт мактабида бўлишиб, унга қарашли “Баркамол авлод” спорт мажмуасининг бугунги ҳолатини ўрганишди.

Ушбу спорт мажмуасида чим устида ҳоккей бўйича жаҳон стандартларига тўла жавоб берувчи Марказий Осиёда ягона бўлган стадион мавжуд бўлиб, бу ер ушбу спорт тури бўйича шуғулланаётган ёшлар ва Ўзбекистон миллий терма жамоаси учун асосий база ҳисобланади.

Ўн мингга яқин томошабинга мўлжалланган замонавий кўринишдаги ушбу стадионда чим устида ҳоккейни ривожлантиришда зарур бўлган барча шарт-шароитлар муҳайё қилинган.

Шунингдек, ишчи гуруҳ ва вилоят спорти мутасаддилари шаҳарнинг оммавий спорт турларига ихтисослашуви ҳамда маҳаллий аҳоли ва ёшларни спортга кенг жалб қилган ҳолда аҳоли саломатлиги даражасини ошириш борасида амалга оширилаётган ишларни муҳокама этишди.