Ишчи гуруҳ спорт федерациялари фаолиятини ўрганишда давом этади

Ўрганиш навбати Ўзбекистон регби федерациясига етиб келди.

Шу мақсадда Спортни ривожлантириш вазири Адхам Икрамов, вазир ўринбосари Шахрулло Маҳмудов ҳамда вазирлик масъул ходимлари Ўзбекистон регби федерациясида бўлиб, мамлакатимизда регби спортини ривожлантириш борасида амалга оширилаётган ишлар билан яқиндан танишди.

Ташриф давомида регби федерацияси раҳбарияти билан Тошкент шаҳри ва вилоятларда регби спорт турининг ривожланиши, унинг моддий-техник базасини мустаҳкамлаш, мураббийлар ва ҳакамлар таркибининг малакасини ошириш, иқтидорли спортчиларни саралаб олиш учун селекция жараёнини яна-да кучайтириш ҳамда юксак натижаларга эришиш учун профессионал спортни ривожлантириш масалалари муҳокама қилинди.

Шунингдек, федерация 2022-йилда Хитойнинг Ханчжоу шаҳрида бўлиб ўтадиган ХIХ ёзги Осиё ўйинларига спортчиларни пухта тайёрлаш мақсадида терма жамоаларнинг машғулотлар жараёнини такомиллаштириш режаларини ҳам тақдим этди.

Учрашув якунларини сарҳисоб қилар экан, Ишчи гуруҳ аъзолари Ўзбекистонда регби спорт турини яна-да ривожлантириш, федерация фаолиятини қўллаб-қувватлаш юзасидан ўз таклифларини билдирди ҳамда юзага келаётган муаммоларни ўз вақтида ҳал этиш борасида яқин ҳамкорлик режаларини белгилаб олишди.