Ислам Махачев Белал Муҳаммад билан бирга машғулот ўтказяпти + ФОТО

Россиялик чемпионнинг машғулотида яримўрта вазн тоифасидаги таниқли аралаш яккакураш устаси Белал Муҳаммад ҳам иштирок этяпти. У Исламга америкалик Дастин Порьега қарши ўтказиладиган жангга тайёргарликда ёрдам бермоқда. Ушбу жанг 1 июнь куни АҚШнинг Ньюарк шаҳрида ташкил этиладиган UFC 302 турнирининг марказий тўқнашуви бўлади. 

Маълумот учун, 32 ёшли Ислам Махачев UFC промоушенида 2015 йилда дебют қилган. 2022 йилнинг октябрь ойида эса чемпионлик камарини қўлга киритди. Ўшанда у Абу-Даби шаҳрида ўтказилган турнирда бразилиялик Чарльз Оливейрани иккинчи раундда мағлуб этиб, камарга эга чиққанди. Шундан кейин у икки маротаба чемпионлик камарини ҳимоя қилди. Ҳар иккала жанг австралиялик Алекс Волкановскига қарши бўлиб ўтганди.

Америкалик 35 ёшли Дастин Порье эса UFC лигасида 2011 йилдан бери ўз жангларини ўтказиб келмоқда. У фаолияти давомида икки бор чемпионлик жангида иштирок этган. 2019 йилнинг сентябрь ойида у UFC 242 турнирида Хабиб Нурмагомедовга, 2021 йилнинг декабрида эса UFC 269 турнирида Чарльз Оливейрага ютқазиб қўйганди.