Ислам Махачев фаолиятидаги энг севимли жангини айтди

Ислам Махачевнинг Дастин Порье билан жанги россияликнинг профессионал фаолиятидаги энг севимли жанги ҳисобланади. Ўша жангнинг бешинчи раундида Махачев Дастинни бўғиш усулида енгиб, енгил вазн тоифасидаги UFC чемпионлик камарини учинчи марта муваффақиятли ҳимоя қилганди. 

"Албатта, биринчи чемпионлик жангидан кейин катта ҳис-туйғулар пайдо бўлди, аммо мен қайта кўриб чиққан жанг - бу Порье билан бўлган тўқнашув эди. Биз у ерда кўчадаги каби муштлашдик ва мен уни финиш қилишга муваффақ бўлдим. Мен бу жангдан роҳатландим. Бу нимани англатади? Бу ҳар қандай жангда охиригача боришимдан далолат беради. Чироқлар ўчиб қолмагунча, мен жанг қиламан, олдинга интиламан, лекин синмайман", - деди Махачев Red Corner MMA нашрига берган интервьюсида.

Ислам Дастин Порьедан кейин бразилиялик Ренато Мойканони ҳам таслим этди ва шундан сўнг енгил вазн тоифасидаги камарини вакант қолдирди. Ярим ўрта вазн тоифасига кўчиб ўтган Махачев австралиялик Жек Делла Маддаленани ҳакамларнинг якдил қарори билан мағлуб этиб, чемпион бўлди.

Энди у ушбу чемпионлик камарининг илк ҳимоясини 15 август куни Филадельфияда бўлиб ўтадиган UFC 330 турнирида вазн рейтингида биринчи ўринни эгаллаб турган ирландиялик Йен Мачадо Гэррига қарши ўтказади.