Ислам Махачев жанг олдидан стафилококк инфекцияси бўлганини тасдиқлади

Кеча россиялик чемпион UFC 302 турнирининг марказий жангида америкалик Дастин Порьени бўғиш усули билан мағлубиятга учратган эди. Журналист жангдан олдин Махачевдан соғлиғида муаммо борми дея сўради. 

"Ҳа, бу тўғри маълумот. Интернетда оёғимда стафилококк кўриниб турган сурат тарқади. Бу инфекция мени анчагина безовта қилди. АҚШга келган биринчи ҳафтамда бу муаммо билан тўқнаш келдим. Бунинг натижасида бир ҳафтадан кўпроқ вақт давомида машғулот ўтказа олмадим. Мен у пайтда шунчаки дам олдим. Агар машғулотни давом эттирганимда асорати оғирроқ бўлиши мумкин эди", - деди Махачев.

Икки вазн тоифасида собиқ UFC чемпиони Конор Макгрегор Исламнинг оёғидаги стафилококк акс этган суратни жойлаб, уни гигиенага риоя қилмасликда айблаганди. Худди шу инфекция сабаб Маҳмуд Мурадов белгиланган жангида иштирок эта олмаганди. Бунинг натижасида UFC ҳамюртимиз билан шартномани бир томонлама бекор қилган эди.