Ислам Махачев жароҳат олибди, Дана Уайт буни тасдиқлади

"Бу нотўғри хабар. Ҳа, Жастин Гэтжи дастлаб кардда бўлмаган - бу ҳақиқат! Аммо бу Исламнинг Тупурияга қарши жанги эмас эди. Қандай жангларни муҳокама қилаётганимиздан ҳавотир олманг. Тасдиқланган ва бўлиб ўтадиган жангларни эълон қилдик. Айтдим-ку, у ерда ғалати ҳолатлар бўлган деб.

Жанг барбод бўлгач, бизнинг асосий матчмейкерларимиз офисга қайтишди ва эрталаб соат тўққизгача ишлашди - Гэтжи шу тариқа кардга кириб қолди. Топурия ҳам аслида бу турнирда жанг қилмаслиги керак эди. Унга ҳам сўнгги лаҳзада қўнғироқ қилишди", - деди ташкилот раҳбари Лас-Вегасда бўлиб ўтган Zuffa Boxing 04 турниридан кейинги матбуот анжуманида.

Бундан ташқари, Уайтнинг таъкидлашича, ярим ўрта вазн тоифасида UFC чемпионлик камарини ўзида сақлаб турган россиялик чемпион айни пайтда жароҳат олган ва унинг октагонга қайтиш муддати масаласи очиқ қолмоқда.

"Унинг қўлида муаммо бор. Мен буни биламан. Унинг жароҳати қанчалик жиддийлиги ва қанча вақт жанглардан ташқарида бўлишини эса билмайман, аммо у жароҳат олган, бу факт!", - дея қўшимча қилди UFC раҳбари.

Ўтган ҳафта охирида енгил вазн тоифасида Илия Топурия ва Жастин Гэтжи ўртасидаги бирлаштирувчи жанг 14 июнь куни Оқ уйда бўлиб ўтадиган ва Америка мустақиллигининг 250 йиллигига бағишланган байрам тадбирининг асосий воқеаси деб эълон қилинганди.