Ислам Махачев ниҳоят Шавкат Раҳмоновнинг жанг ҳақидаги гапларига жавоб қайтарди

"Шавкат Раҳмонов охирги марта интервью берганида, оёғида катта тизза боғлами билан, жароҳатланган ҳолда эди. Ҳозир эса у мен билан жанг қилмоқчи. У уни танлашим кераклигини айтмоқда. Хўш, Шавкатни танлаб, у тузалгунича бир ярим йил кутишим керакми? Майли, тузалиб олаверсинчи, у даъвогарлардан бири бўлади. Мен ҳеч қачон у билан жанг қилмайман демаганман. Тузалиб, келаверсин", — деди Махачев "Матч ТВ"га берган интервьюсида.

Шавкат Раҳмонов 2024 йилнинг декабрь ойидан бери октагонга чиқмади. Ўшанда у даъвогарлик жангида Йен Мачадо Гэррини мағлуб этган бўлса-да, тиззасидаги жароҳати сабаб узоқ муддатга сафдан чиқиб, чемпионлик имкониятидан фойдалана олмаганди.

Ислам Махачев ҳам ўзининг сўнгги жангини ўтган ойда ирландиялик рақибига қарши ўтказиб, ҳакамларнинг якдил қарори билан ярим ўрта вазн тоифасидаги чемпионлик камарини илк бор муваффақиятли ҳимоя қилганди.

Раҳмонов 2027 йилнинг бошида октагонга қайтишни режалаштирмоқда, Махачев эса жорий йилнинг охири ёки келаси йилнинг бошида бразилиялик Карлос Пратесга қарши ҳимоя жангини ўтказишни мўлжалламоқда.