Ислам Махачев ва Хамзат Чимаев бир кунда жанг ўтказиши мумкин

Бу жанглар катта эҳтимол билан июнь ойида Лас-Вегасда ташкил этиладиган Халқаро жанглар ҳафтаси доирасида ўтказилади. Бу ҳақда Хамзат Чимаевнинг жамоасига яқин бўлган мураббий ва менежер Расул Шамсудинов хабар берди. 

"Илия Топурия ва Ислам Махачев жанги Хамзат Чимаев октагонга чиқадиган турнир кардидан ўрин олади. Бу жанглар июнь ойига мўлжалланмоқда. Шундай экан, катта шоуга тайёр туринг. Иккита чемпионлик жанги бир кунда ўтказилади. Бу UFC промоушенининг 2025 йилги энг катта турнири бўлади. Хамзат Дю Плессига, Махачев эса Топурияга қарши! Ҳозирча бу жанглар расман тасдиқлангани йўқ, лекин тез орада эълон қилинади. Фикримча, Чимаев ва Топурия бўлажак жангларда ғалаба қозонади. Илиянинг ғалаба учун имкониятини 60 фоизга баҳолаяпман", – деди Шамсудинов.

Аввалроқ, Ислам Махачев ва Илия Топурия ўртасидаги чемпионлик жанги 28 июнь куни Лас-Вегасда ташкил этиладиган UFC 317 турнири доирасида ўтказилиши хабар қилинганди.