Ислам Махачевнинг UFC`даги рақиби аниқланди

Россиялик аралаш яккакураш устаси ярим ўрта вазн рейтингида иккинчи ўринни эгаллаб турган ирландиялик Йен Мачадо Гэррига қарши кечадиган жангда ўз чемпионлик камарини ҳимоя қилади. Бу ҳақда "Eurosport" канали шарҳловчиси Альваро Колменеро вазиятга яқин манбаларга таянган ҳолда хабар берди.

Бунинг натижасида Ислам билан жанг учун потенциал даъвогарлардан бири эквадорлик Майкл Моралес рўйхатдан чиқарилган.

"Мен бу ҳақда аввал ҳам гапирганман. Ҳозирда музокаралар босқичида турган жанг - бу Ислам Махачев ва Йен Гэрри ўртасидаги тўқнашув бўлиб, бу ҳақда манбаларим хабар бермоқда. Моралес аллақачон чемпионлик жангига даъвогарлар сафидан чиқарилган. Тахминларга кўра, жанг август ойида Филадельфиядаги UFC 330 турнирида бўлиб ўтади, гарчи Исламнинг ўзи хабарларидан бирида Халқаро жанглар ҳафталигида октагонга чиқишига ишора қилган бўлса-да", - деб ёзди испаниялик мухбир ижтимоий тармоқдаги саҳифасида.

Маълумот учун, UFC 330 турнири 15 август куни Филадельфияда бўлиб ўтади, 11 июль куни эса Лас-Вегасдаги UFC 329 турнири Халқаро жанглар ҳафталигини якунлаб беради.