Ислам Махачевнинг яримўрта вазндаги режалари ошкор бўлди

Россиялик аралаш яккакураш устасининг менежери Али Абдел-Азизнинг хабар беришича, Ислам яримўрта вазнда камида учта жанг ўтказишни режалаштирган. Махачев австралиялик Жек Делла Маддаленанинг камарини тортиб олганидан кейин бу чемпионлик унвонини икки бор ҳимоя қилади.

"Ислам Махачев – айни пайтда UFC`нинг энг пешқадам жангчиси. Яна иккита чемпионлик ҳимоясидан сўнг у UFC тарихидаги энг буюк жангчига айланади", – деди Абдел-Азиз.

Эслатиб ўтамиз, Жек Делла Маддалена 10 май куни Монреал шаҳрда ташкил этилган турнирда америкалик Белал Муҳаммадни очколар ҳисобига кўра мағлуб этиб, яримўрта вазннинг янги чемпионига айланганди. Ислам Махачев эса енгил вазндаги камарини вакант қолдириб, яримўрта вазн тоифасига иккинчи чемпионлик камарини қўлга киритиш илинжида ўтган эди. У енгил вазндаги камарини тўрт бор муваффақиятли ҳимоя қилиб, ўзига хос рекорд қайд этганди. 

Катта эҳтимол билан Маддалена - Махачев жанги октябрь ойида БАА пойтахти Абу-Даби шаҳрида ташкил этиладиган UFC 321 турнири доирасида ўтказилади.